Live Aid ag 40: Cartlann grianghraf dhigitithe Live Aid seolta ag Leabharlann Náisiúnta na hÉireann
Tá na híomhánna ar fáil go héasca don phobal anois ar líne den chéad uair anseo.
Leis an taifead uathúil amhairc seo, cuirtear léargas lom gan eagarthóireacht i láthair ar cheann de na himeachtaí is sainiúla ceoil, cultúir agus tiomsaithe airgid den 20ú haois, imeacht a raibh Sir Bob Geldof ar thús cadhnaíochta ann ar son faoiseamh ó ghorta san Aetóip, a léirítear le saothar na gcéadta grianghrafadóir idirnáisiúnta.
Leis na híomhánna, cuirtear in iúl scála agus fuinneamh na gceolchoirmeacha ag Staid Wembley i Londain agus ag Staid JFK in Philadelphia an 13 Iúil 1985, lenar cuimsíodh léirithe ó Freddy Mercury, David Bowie, Paul McCartney, U2, Sting, Madonna, Sade, Black Sabbath, Phil Collins agus a thuilleadh. Agus an chartlann digitithe anois ag Leabharlann Náisiúnta na hÉireann, cuireann sí meascán de radhairc aithnidiúla agus macánta ar fáil ón imeacht ‘Júcbhosca Domhanda’ a craoladh roimh 1.9 billiún duine tráth. Cuimsítear íomhánna sa chnuasach lena léirítear:
Is cuid de Chartlann Iontaobhas Band Aid iad na grianghraif a bronnadh ar NLI in 2017.
Próiseas Digitithe NLI
Chun an bailiúchán a chur ar fáil don phobal, d’oibrigh foirne ag Leabharlann Náisiúnta na hÉireann (NLI) chun an bailiúchán a mheas, a chatalógú agus a dhigitiú ó mhí Aibreáin 2022.
Cuirtear an obair speisialtóra sin i gcrích thar roinnt suíomhanna laistigh de NLI ag Sráid Chill Dara. Déantar bail gach íomhá grianghrafadóireachta bunaidh a mheas ann. Déantar obair chaomhnaithe ar mhíreanna aonair nuair is gá, agus faigheann gach mír uimhir aitheantais uathúil agus meiteashonraí tuairisciúla fad a dhéantar í a chatalógú agus a shocrú, sula dtarlaíonn an scanadh ardtaifigh agus an próiseas digitithe.
Dúirt Crónán Ó Doibhlin, Ceannasaí Bailiúchán Speisialta: “Leis an tionscadal seo, tarraingítear aird ar chumhacht an digitithe, agus an catalógú saineolach agus bonneagar digiteach slán san áireamh, chun acmhainneacht chartlann Iontaobhas Band Aid a cuireadh de chúram ar Leabharlann Náisiúnta na hÉireann a bhaint amach. Fad a leanaimid den ábhar bunaidh cartlainne a chosaint, is féidir leis an bpobal sásamh a bhaint as taispeántas agus spleodar Live Aid ar líne anois agus iad aon áit ar domhan. Chun gach grianghraf sa chartlann a phróiseáil ó thús deireadh, bhí foireann saineolaithe leabharlainne agus caomhnaithe ar fud NLI i gceist. Tá taifead beoga inchuardaithe de Live Aid ón dá thaobh den Atlantach mar thoradh air sin.”
Dúirt an Dr Audrey Whitty, Stiúrthóir Leabharlann Náisiúnta na hÉireann: “Trí infheistiú i bhfoirne saineolacha agus áiseanna digitithe, cinntíonn Leabharlann Náisiúnta na hÉireann go ndéantar ábhair a bhfuil tábhacht chultúrtha ag baint leo a chaomhnú agus a chomhroinnt go gníomhach i bhformáidí nua. Sampla cumhachtach is ea an bailiúchán seo ó Iontaobhas Band Aid den chaoi a nascaimid daoine leis an am a chuaigh thart ar bhealaí inrochtana marthanacha. Rachaidh ár gcartlann dhigiteach i gcion ar na daoine sin a bhfuil cuimhne acu ar Live Aid agus spreagfaidh sí glúnta nua chun mothú agus tionchar an imeachta iontaigh sin a fhionnadh.”
Taiscéal: Féach anseo chun cartlann grianghraf dhigiteach Live Aid de chuid Leabharlann Náisiúnta na hÉireann a bhrabhsáil agus aimsigh mionsonraí faoin taispeántas agus imeachtaí gaolmhara atá ag teacht aníos.
Taispeántas ar an Láthair: Live Aid ag Leabharlann Náisiúnta na hÉireann
Chun a chur leis an eisiúint ar líne, déanfaidh NLI taispeántas nua, Live Aid ag Leabharlann Náisiúnta na hÉireann, a chur i láthair, a osclófar i mí Mheán Fómhair 2025 ag Cartlann Náisiúnta Ghrianghrafadóireachta NLI i mBarra an Teampaill. Leis an taispeántas—atá saor in aisce don phobal—cuirfear rogha choimeádta íomhánna i láthair ó thabhartas Iontaobhas Band Aid a leagtar amach chun fuinneamh agus sceitimíní an lae iontaigh sin a mhúscailt.
CRÍOCH
Tuilleadh
